Just Coke is it ?

හදවත් සැත්කමකට බඳුන් ව සිටින මගේ මිත්‍රයෙක් මට මේ වගේ කථාවක් කීවා.

“පරිස්සම් වෙනව කියන එකනම් කරන්න බෑ මචං; මැරෙන්නයි වෙන්නේ“

“ඉතින්, පරිස්සම් නොවුණොත් කොහොමත් මැරෙනව නේ !“

“කොහොමත් මැරෙනවා නේ. ඒක ගැන වැඩිය කරදර නො වී ඉන්න ටික නිදහසේ ඉන්න එක වැදගත් කියල මම හිතුවා“

මොකද හිතන්නේ ?  අවංක ව ම මට දැන් හිතෙනවා ඒ කතාවත් ඇත්ත කියලා. 

ගිය ඉරිදාවේ නවාතැන්පළ පැත්තේ ගොඩ වෙන කොට මිතුරියක් කීවා, මෙහෙම කතාවක්.

“කොකාකෝලා තහනම් කරල ලූ ! එහෙම නැත්නම් තහනම් කරන්න යනවලූ !“

ඇය විස්තර දැන ගෙන තිබුණේ ෆේස් බුක් තුළින්.  ඒ ගැන පළ වෙලා තිබුණ අපේ ෆේස්බුක් මිතුරන්ගේ ප්‍රතිචාර ඇය විසින් මටත් පෙන්නුවා.       

ඇය කී කතාවනම් ඇත්ත ය; ඒත් මේ පුවත ඇත්තක් ද ?

එදා හවස හතර ට විතර ගත් දිවා ආහාරය එක්කත් බීපු කෝක් බඩියක් ඒ වෙන කොටත් මගේ බඩ ඇතුළේ ! තහන්ම කළානම් කොහොමද දෙයියනේ එහෙම වෙන්නේ....?  ඒ නිසා මට හොඳට ම ෂුවර් මේක අපේ වාම-ප්‍රගතිශීලි මිත්‍රයන් ගේ ආශාව වෙනුවෙන් ලියවුන එකක් කියලා.  හැබැයි කෝක් කොම්පැනියේ නරක පැටිකිරියත් වර්ල්ඩ් ෆේමස් එකක් නිසා මේ කතන්දරේ පිටුපස්සේ මුකුත් ම නැති වෙන්නත් බෑ. 

මේ කතන්දරෙන් මතු වුණ කාරණා ගණනාවක් තිබුණා කියල මට හිතෙන්නේ.  නිකම් දත්තයක් හැටියට තිබුණා සමාගම විසින් කැළණි ගඝට පොම්ප කරන ලද භූමිතෙල් ලීටර් 25,000ක් නිසාවෙන් අඹතලේ ජල පවිත්‍රාගාරයත් විනාශ වෙලා ගිහින් බවත්, ඒ හේතුවෙන් එක් දිනක දී සිදු වූ එම විනාශයට වන්දි වශයෙන් සමාගම විසින් රුපියල් බිලියනයක් ගෙවා ඇති බවත්.  ප්‍රතිචාරකයන් ගේ විරෝධය එල්ල වූයේ මෙය ජනතාවගෙන් වසන් කිරීම ගැන බව පෙනෙන්නට තිබුණා.ෆේස්බුක් වැනි සමාජ ජාලයන් විසින් දරුණු ලෙස මිනිස් සබඳතා විනාශ කර ඇති බවත්, සමස්ත අන්තර් ජාලය මිනිස් ශිෂ්ටාචාරයේ පිළිළයක් බවත්, එමඟින් පුද්ගලිකවාදයක් ගොඩනගන බවත් බෙරිහන් දී, අඳෝනා නගන පිරිසත් මෙදා වතාවේ අකුලා ගෙන ප්‍රධාන ධාරාවේ මාධ්‍ය මෙසේ ඇත්ත හංගන විට, විකෘති කරන විට සමාජ ජාලවල ඇති වැදගත්කම අවධාරණය කර තිබීම ගොඩක් වැදගත් කියල මට හිතුනා.  මොකද, ඒ අන්ත පසුගාමීත්වය පරාජය කිරීම වැඩියෙන් වැදගත් කියල මම හිතන නිසා.            

අපේ වාම-ප්‍රගතිශීලි ධාරාවේ මිත්‍රයිනුත්, අර කීව අන්ත පසුගාමී ධාරාවේ උදවියත් බහුජාතික සමාගම්, නූතන ධනවාදී පාරිභෝජන රටාව වගේ මහේක්ෂ තලයේ සටන්පාඨ පෝෂණය කර ගන්නට මේ අවස්ථාව යොදා ගන්න දරණ උත්සාහයකුත් මේ අතරේ දකින්න තිබුණා.  ඒකෙත් වරදක් නෑ. 

ඒත් මට ගැටළුවක් තියෙනවා, ඒ එක්කත් විසඳගන්න.  පහු ගිය කාලයක දී මාත් මේ වගේ අදහසක් මත ඉඳලා විවිධ වර්ජන ව්‍යාපාරවලට දායක වුනා.  එක කාලයක දී ටුබැකෝ කොම්පැනියේ නිෂ්පාදන ගන්නේ නෑ; තව කාලෙක දී බාටා කොම්පැනියේ; තවත් කාලයක දී කෝක් කොම්පැනියේ පවා...අධිරාජ්‍යවාදය, මනුස්ස ශිෂ්ටාචාරය වලපල්ලට ඇද ගෙන යමින් තියෙන බව ට විවාදයක් නෑ.  ඒකට විරුද්ධයි කියන ඔය ආගම්-ජාති පිස්සෝ පවා ඒකෙ ම සහචර කොටස්.  ඒ තොගය ම පරාජය කරගන්න ඕන.  ඒත්, මේ ක්‍රියාමාර්ගවලින් ඒක කරන්න පුළුවන් ද ? ඒ ක්‍රියාමාර්ග අන්තිමට ම සේවය කරන්නේ අපි විසින් පරාජය කරන්න යන තැනට ම නෙවෙයි ද ?  කාලෙකට කලින් අපි එක්ක අධිරාජ්‍ය විරෝධි සටන් පෙරමුණේ කඳවුරු බැඳ ගෙන හිටපු වීරයෝ ගොඩ දෙනෙක්, අද වෙන කොට වර්ගවාදය හරහා අධිරාජ්‍යවාදයේ හොඳම සහචරයන් වෙලා තියෙනවා ඇස් පනා පිට ම දැක බලා ගන්න පුළුවන්. මහින්ද රාජපක්ෂවාදි කල්ලිය තරම් වෙන ඉස්තරම් උදාහරණයක් නෑ.  හිතට දුක, එදා අපි කරපු අරගලවල ප්‍රාග්ධනයත් අද උන් ඒ කුප්ප වැඩේ ට පාවිච්චි කරමින් ඉන්නවා කිසි ම හිරිකිතයක් නැති ව ! මේ තත්වයන් නිසා ඒ උපාය-උපක්‍රම ගැන මම හිතන්නේ අපි බරපතල විදියට ආයේ ආයෙමත් හිතල බලන්න වටිනවා කියලා. 

දැන් කෝක් කොම්පැනිය තමන්ගේ පාරිභෝගිකයන් ට වස-විස විකුණල කියල පැහැදිලි තොරතුරු තියේනම් ඒ ගැන ක්‍රියාමාර්ගයක් වෙනම ම ගන්න අවශ්‍යයි.  වතුර ට විස එකතු කිරීම පිළිබඳ දඩ ගැසීම දක්වා ම කතාව ඇත්ත වුණත්, ඒකෙන් මේ කියන වස-විස ශරීර ගත වීම පිළිබඳ අවනඩුව විසඳෙන්නේ  නෑ නේ.  හොඳයි, තොරතුරු තියේනම්,  ඇයි අපි පාරිභෝගික ආරක්ෂණ අධිකාරිය වගේ තැනක ඒ ගැන පැමිණිලි කරන්නේ නැත්තේ...?  මොකද, කවුරුත් දන්නවා කෝක් කොම්පැනිය විතරක් නොවෙයි, බෙහෙත්, කිරිපිටි, ආයුධ, ගෘහභාණ්ඩ, ප්‍රවෘත්ති ඒජන්සි මෙ කී- නො කී ඒවා විතරක් නොවේ බණ-දහම් ගැන පොත්-පත් ගහන කොම්පැනිය පවා වැඩ කරන්නේ ධනවාදයේ මේ කුරිරුතම සූරා කෑමේ යාන්ත්‍රණය පාවිච්චි කරමින් කියලා.  දැන් අපේ පොඩි ජයග්‍රහණයක් තියෙනවා; ඒ, මේ යාන්ත්‍රණයේ හවුල්කරුවන් විසින් හංගගෙන තිබුණ මේ රහස හෙළිදරව් කරගැනීම පැත්තෙන්.  ඒක අඩුපාඩුකම් ගොඩක් තියෙන දුර්වල මට්ටමේ එකක් වුණත්, ඒ පියවර වැදගත්.  ඊ ළඟට අපට පුළුවන් නේ ද මේවා ගැන වින්දිතයන් ගේ පැත්තෙන් කොවල් කළ හැකි ශක්තිමත් යාන්ත්‍රණයක් වෙනුවෙන් සටන් කරන්න.  දැනට තියෙන ව්‍යුහයන් පාවිච්චි කිරීම එක විදියක්. 

ඒ හැම දෙයක් ම දුර්වල, නොදියුණු සමාජයක පණ බේර ගෙන ඉන්නවා කියන්නේ පණ යන වැඩක්.  ආපහු මට මතක් වෙන්නේ මුළින් ම මම කියපු මිත්‍රයා ගේ කතාව.  මේකෙ දි ‘පරිස්සම් වීම‘ සඳහා එකක් අතහරින අපට ආයේ තෝර ගන්න තියෙන්නෙත් ඒ වගේ ම එකක් ! කෝක් නොබීව කියල මැරෙන්නේ නෑ කියල කියන මිත්‍රයන්ගෙන් මට අහන්න තියෙන්නේ ඒ කියන විදියට නොමැරී කන්න-බොන්න සහතික කරල කියන්න පුළුවන් දේවල් මට හොයල දීපල්ලා කියලා. 

හැබැයි, කෝකටත් කියල මම දන්න කියන උන්ට පනිවුඩ යැව්වා, මෙහෙම නරක ආරංචියක් කෝක් ගැන යනවා; කෝකටත් කෝක් නිෂ්පාදනවලින් මේ දවස්වල පරිස්සම් වෙයල්ලා කියලා.  වතුර වුණත් උණු කරල ම බොන්න කියලත් කීවේ වතුරටත් බඩු මිශ්‍ර වෙලා කියන නිසා.

“උණු කළා ම ඩීසල් හරි, භූමිතෙල් හරි අයින් වෙනවා කියලා ෂුවර් ද?“ සමහර පණ්ඩිත උන් ඇහුවා.

“ඔව්; එහෙම විශ්වාස කරපල්ලා. නැත්නම් වතුරත් නො බී ඉන්නයැ !“ මට ඒ බක පණ්ඩිතයන් ට කියල දාන්න වුණා !!